समस्त खाद्यप्रेमींना सप्रेम नमस्कार. हे सदर सुरू केल्यापासून मला आपल्या सर्वांकडून भरभरून प्रतिक्रीया येत आहेत, आणि त्याचबरोबरीने तुम्ही हे पदार्थ स्वतः करून फोटो पण पाठवून देताय याचा मला खूप आनंद आहे. सगळ्यांना खूप खूप धन्यवाद. 🙏
आज मी आपल्यासाठी घेऊन आले आहे, नेहमीप्रमाणेच कमी सामग्री, आणि कमी प्रक्रिया केलेले काकडीचे घावन.
साहित्य: (६-८ घावने होतील इतके)
२ काट्याच्या काकड्यांचा कीस, काकडीचे साल काढून कीस करावा
१ वाटी चिरलेला गुळ
२ वाट्या गव्हाचे पीठ
१ वाटी तांदुळाचे पीठ
चिमूटभर मीठ
अर्धा चमचा वेलची पावडर
कृती:
काकडीच्या कीसामध्ये गुळ घालून १०-१५ मिनिटे ठेवा, तो हळूहळू विरघळायला लागेल. मग हाताने हा गूळ नीट मिसळून घ्या. यात बाकीचे सगळे साहित्य घेऊन सरबरीत कालवून घ्या. पाणी घालूच नका, काकडीला आपोआप जे पाणी सुटते त्यातच पीठ कालवले जाते.
आता एका नॉन-स्टिक पॅनवर किंचित तेल घाला आणि त्यावर पळी-दीड पळी मिश्रण घालून त्याचे घावन घाला. दोन्ही बाजूने खरपूस भाजून, साजूक तुपाबरोबर खायला घ्या गरमा गरम.
आहे किनई, फर्मास मेनू...मग वाट कसची पाहताय...आणा काकड्या, नि घाला घावन...
सांगा कसं होतंय..
