सहज सोपी अन्नपूर्णा - भाग १ - भीम लाडू

सध्या सुरू असलेल्या वेगवेगळ्या डाएट्सच्या प्रकारांमध्ये वारंवार समोर येणारी गोष्ट म्हणजे प्रथिने किंवा प्रोटीन यांचा आहारातील समावेश. आमच्या लहानपणी, आई किंवा आजी चार वाजता खायला म्हणून जो खाऊ बनवायच्या तो असाच मस्त प्रोटीन पॅक्ड असायचा. त्यातलाच एक मस्त, सोप्पा आणि आमच्या घरात सर्वांच्या आवडीचा पदार्थ म्हणजे भीम लाडू. पहा बनवून आणि सांगा आवडतोय का..

साहित्य:

जाड पोहे, शेंगदाणे, फुटाणे डाळ, किसलेले खोबरे - प्रत्येकी एक वाटी (आवड आणि उपलब्धतेनुसार कमी जास्त प्रमाण चालेल)

तीळ, जवस - प्रत्येकी १ टेबल स्पून

गूळ - एक ते दीड वाटी चिरून किंवा किसून घ्यावा

तूप - ४ टी स्पून, शक्यतो पातळ करून घ्यावे

कृती:

जाड पोहे, शेंगदाणे, फुटाणे डाळ, खोबरे, तीळ आणि जवस हे सर्व वेगवेगळे मंद आचेवर खमंग भाजून घ्यावे. "मंद आचेवर" हे नका विसरू. नंतर मिक्सरमध्ये प्रथम तीळ आणि जवस भरड भरड बारीक करून घ्यावे. मग पोहे, शेंगदाणे, फुटाणे डाळ, खोबरे आणि गूळ असं मिक्सरला भरड बारीक करून घ्या. गूळ नीट बारीक झाला पाहिजे. मिश्रण खूप जास्त बारीक नका करू. हा लाडू मस्त चावून चावून खण्यातच खरी चम्मतग आहे.

                                           

आता सगळं मिश्रण ३-४ चमचे तूप घालून मळून घ्या. आणि मग छोटे छोटे लाडू वळून घ्या. लक्षात ठेवा, हाताची चव आणि काळजातली माया पदार्थात उतरायची असेल, तर  मिश्रण मळायला चमचा आणि लाडू वळायला मोल्ड नकोच..

तर मग करून पहा, भीम लाडू, आणि नक्की सांगा आवडतात का..तुम्हाला आणि तुमच्या चिल्ल्या पिल्ल्यांना..

#सहज_सोपी_अन्नपूर्णा