लॉकडाऊन असू दे किंवा नसू दे, भाजी किंवा कोशिंबीर कोणती करावी हा स्वयंपाकघरात शिजणारा पहिला प्रश्न असतो. कधी मोठ्या सुट्टीवरून परत घरी आल्यावर, किंवा घरी विशेष भाजीपाला नसेल अशावेळी तर हा प्रश्न हमखास पडतोच.
अशा खिंडीत गाठणाऱ्या प्रश्नाला चोख आणि पौष्टिक उत्तर म्हणजे डांगर. चला तर मग पाहू...भाकरी असो किंवा पोळी यांच्याशी छान गट्टी करणारे डांगर..!!
साहित्य:
१ वाटी धुवून वाळवलेली उडदाची डाळ
जिरे, धणे - प्रत्येकी ३-४ छोटे चमचे
कृती:
एका जाड बुडाच्या कढईमध्ये उडीद मंद आचेवर भाजून घ्यावेत. बाहेर हॉल मधून "कसला खमंग वास येतोय" अशी विचारणा झाली म्हणजे उडीद भाजून झाले असं समजा. मग त्याच कढईत धणे आणि जिरे भाजून घ्या. हे सगळं थंड झालं की मिक्सर मधून एकदम छान बारीक पूड करून घ्या. आणि ही पूड बरणीत भरून ठेवा. फ्रिजबाहेरदेखील अनेक दिवस (१-२ महिने तरी, किंवा जास्तच) टिकते.
काय?? आहे किनई सोप्पी कृती. अत्यंत कमी सामग्री, अत्यंत कमी प्रक्रिया(प्रोसेससिंग) केलेले पदार्थ हीच आपल्या या सदराची खासियत आहे. आता सांगते हे खायचं कसं.
ज्या ज्या वेळी भाजी किंवा कोशिंबीर काय हा प्रश्न येतो तेव्हा सॉस वगैरे खाण्यापेक्षा तुम्ही खाऊ शकता डांगर. आपण बनवलेलं डांगर २-३ चमचे घ्या, त्यात बारीक चिरलेला कांदा, कोथिंबीर घाला. मस्त चुरचुरीत मोहरी, कढीपत्ता, आणि भरपूर हिंगाची फोडणी द्या. असेल तर एखादी भरली मिरची किंवा सुकी लाल मिरची तळून, चुरून टाका. चवीनुसार मीठ घालून आणि थोडंसं दही घालून मिसळा. झालं मग खमंग आणि पौष्टिक डांगर तय्यार.
बनवा पटापट, आणि सांगा कसा होतोय बेत.
माहितीये का, डांगर भाकरी दे नाहीतर विंचू चावेल..!!
Ek number
ReplyDelete