सहज सोपी अन्नपूर्णा - भाग ३ - तांदूळ पिठीची उकडशेव

कधी कधी नेहमीच्या पोहे, उपमा अशा न्याहारीचा जाम कंटाळा येतो. किंवा कधी संध्याकाळी  चारच्या भुकेला मस्त गरमा गरम काही खायचं असतं. पण उपलब्ध साधनांची कमतरता, किंवा वाढलेलं वजन, किंवा कधी  अजून काही, यामुळे ऑप्शनला असलेले पदार्थ काही उरतच नाहीत. काय? होतं ना तुमचंही असं? मग नक्की करून पहा तांदूळ पिठीची उकडशेव.

साहित्य: (चार माणसांसाठी)

४ वाट्या तांदळाचे पीठ

१ वाटी आंबट ताक

लसूण आणि कोथिंबिरीचं वाटण २-३ चमचे

मीठ चवीनुसार

फोडणीसाठी तेल, जिरे, आणि तीळ

कृती:

एका भांड्यात तांदळाचं पीठ, मीठ, कोथिंबीर-लसणाचं वाटण एकत्र करावं, आणि त्यात ताक घालून घट्ट मळून घ्यावं. गरज लागल्यास थोडं पाणी घालावं. ताक जास्त आंबट नसेल तरी हरकत नाही.

मळलेला गोळा चकली यंत्रात घालून त्याची शेव पाडावी आणि उकडून घ्यावी. आमच्याकडे ५-६ जण असल्यामुळे मी इडली पात्रात उकडून घेते. तुमच्याकडे मोदक उकडायची जी यंत्रणा असेल त्यातही उकड काढली तरी चालेल.

उकडलेली शेव ताटलीत घालून वरती मस्त खमंग तीळ, जिऱ्याची फोडणी घालून खायला घ्या.
पैजेवर सांगते, पोरा-टोरांना तर आवडेलच पण मोठेही खुश होतील.
मग आता झटपट झटपट तयारीला लागा आणि बनवून पहा उकडशेव. आणि हो, कशी झालीये हे सांगायला विसरू नका.

#सहज_सोपी_अन्नपूर्णा